Л.Энх-Амгалан: Би дахиж УИХ-ын нэг ч эмэгтэй гишүүнтэй ам зөрөхгүй

УИХ-ын гишүүн, Боловсролын сайд Л.Энх-Амгалан боловсролын салбарын төсвийг танаж буй УИХ-ын гишүүдийн шийдвэрийг шүүмжилж, энэ нь хүүхдийн эрх ашигт сөргөөр нөлөөлнө гэж мэдэгдлээ. Сайдын мэдээлснээр, боловсролын салбарт хэрэгжүүлэхээр төлөвлөсөн хэд хэдэн чухал төсөл, арга хэмжээний санхүүжилт төсвөөс хасагджээ. Тухайлбал, 2027 онд байгуулахаар төлөвлөсөн төрөлжсөн ахлах сургуулиуд, таван бүсэд Кембрижийн хөтөлбөртэй, дотуур байртай сургууль байгуулах, 100 сургуулийг “ногоон сургууль” болгох, шинээр ашиглалтад орж буй сургуулиудыг тоног төхөөрөмжөөр хангах зэрэгт зориулсан 75 тэрбум төгрөгийн төсөв хасагдсан байна. Мөн сургуулиудын түрээсийн зардлыг танасныг тэрбээр шүүмжлэв. Л.Энх-Амгалан Үндэсний баялгийн сангийн тухай хуулийн дагуу хуримтлагдсан хөрөнгийг боловсрол, эрүүл мэндийн салбарт зарцуулах ёстой атал эсрэгээрээ төсвийг нь танаж байгаад гайхаж буйгаа илэрхийлжээ. Тэрбээр УИХ-ын Байнгын хороодын хуралдааны үеэр гишүүдээс боловсролын салбарын төсвийг хасах чиглэлээр 800 орчим зарчмын зөрүүтэй санал гарсныг онцлов. Түүнчлэн боловсролын салбарт он дамжин хэрэгжиж буй 170 орчим бүтээн байгуулалтын ажил байгаагаас 60-70 нь гурваас дээш жил үргэлжилж байгааг дурдлаа. Эдгээр барилгын ажлыг дуусгахад шаардлагатай 170 тэрбум төгрөгийг төсвийн тодотголд тусгасан ч хэлэлцээгүй орхисныг тэрбээр шүүмжлэлтэй хүлээн авч байна. “Яриад байгаа зүйл нь хүүхдийн төлөө мэт боловч хийж байгаа үйлдэл нь хүүхдийн эсрэг байна” хэмээн тэрбээр байр сууриа илэрхийлжээ. Үүнээс гадна Л.Энх-Амгалан сургуулиудын зүгээс эцэг эхчүүдийн дунд урлаг, спортын арга хэмжээ зохион байгуулахыг хориглож, зөрчсөн тохиолдолд хариуцлага тооцохоо мэдэгдлээ. Мөн тэрбээр цаашид эмэгтэй гишүүдтэй маргаан үүсгэхгүй байх байр суурьтай байгаагаа илэрхийлсэн байна.

Article source: Sonin | Image credit: Sonin

Follow us on Instagram: @news.tringlobe
Follow WhatsApp channel: Tringlobe Media WhatsApp Channel
Join a WhatsApp group: Choose your country group