Stjarnan sigraði Njarðvík með 103 stigum gegn 79 í IceMar höllinni í kvöld, þegar 5. umferð Bónus deildar karla í körfuknattleik lauk. Sigurinn var sá annar í röð hjá Stjörnunni, sem hefur átt erfitt uppdráttar í upphafi tímabils. Hilmar Smári Henningsson var stigahæstur í liði Stjörnunnar með 24 stig. Að leik loknum sagði hann frammistöðuna þá bestu hjá liðinu á tímabilinu til þessa. Hann benti á að liðið hefði loksins náð að yfirfæra góða vinnu af æfingasvæðinu yfir í leik. „Mér fannst við loksins koma með einhverja orku sem við höfum ekki sýnt í fyrstu leikjunum,“ sagði Hilmar Smári. Hann lagði áherslu á að liðið hefði sýnt betri liðsheild, stjórnað sóknarfráköstum og fylgt varnaruppleggi þjálfarans, Emils Barja, af kostgæfni. Þrátt fyrir tvo sigra í röð vill Hilmar Smári ekki meina að liðið hafi svarað gagnrýni sem hefur beinst að þeim eftir hæga byrjun á mótinu. „Við erum ekki búnir að svara neinu, við erum bara búnir að vinna tvo leiki. Við erum enn með fleiri töp en sigra, þannig að það er langt í land ennþá,“ sagði hann.