Hulda Bjarnadóttir, forstöðumaður Menningar og miðlunar hjá Eimskip og forseti Golfsambands Íslands, deilir hér þremur ráðum sem hún hefði viljað gefa sjálfri sér þegar hún var tvítug. Í samtali við Vísi segir Hulda að mikilvægast sé að vera óhrædd við að segja já við ævintýrum. Hún bendir á að það sé ekki nauðsynlegt að hafa allt á hreinu á tvítugsaldri. „Ævintýrin, fólkið sem þú hittir og hlutirnir sem þú þorir að prófa eiga eftir að móta þig miklu meira en fyrirfram ákveðið plan,“ segir hún og bætir við að bestu sögurnar verði oft til þegar áætlanir fara úr skorðum. Í öðru lagi leggur Hulda áherslu á mikilvægi íþróttaandans. Hún segir að íþróttaiðkun á yngri árum hafi kennt henni margt sem nýtist í lífinu, svo sem að mæta til leiks, leggja sig fram, vera hluti af liði og takast á við ósigra. Hún hvetur ungt fólk til að halda fast í þá reynslu, þar sem íþróttaandinn og tengslanetið sem fylgir íþróttum séu verðmæt á öllum sviðum lífsins. Að lokum ráðleggur hún ungu fólki að reyna ekki að gera ferilinn að beinni línu. Hún segir að krókaleiðir geti verið það sem styrki einstaklinga mest og að ólík reynsla, jafnvel þótt hún virðist ekki rökrétt á blaði, verði að lokum hluti af sama ævintýrinu. „Lífið er ekki spretthlaup eftir beinni braut,“ segir Hulda og hvetur fólk til að vera óhrætt við að skipta um vettvang, læra nýja hluti og nýta styrkleika sína í ólíkum aðstæðum.