कर्णाली, कात्तिक १४ – कर्णाली हिमाली जिल्लाका उच्च भागमा हिमपातको कारण जनजीवनमा असर परेको छ। माथिल्लो कर्णालीमा पर्ने हुम्ला, मुगु, जुम्ला, डोल्पा र कालीकोटका उच्च भागहरूमा हिमपात भएको जानकारी दिइएको छ। डोल्पा जिल्लामा शे‑फोक्सुण्डो, डोल्पो बुद्ध र छार्का ताङसोङ गाउँपालिकामा हिमपात भएको र हुम्लामा नाम्खा, मुगुमा मुगुम कार्मारोङ, जुम्लामा पातारासी, तातोपानी, कनकासुन्दरी गाउँपालिका तथा कालीकोटको तिलागुफा नगरपालिका हिमपातको रिपोर्ट गरिएको छ। डोल्पा जिल्लाको प्रमुख जिल्ला अधिकारी जुनु हमाल ढकालले तल्लो डोल्पामा वर्षा र माथिल्लो डोल्पामा हिमपात भइरहेको बताउँदै, कात्तिक १२ देखि सबै पदयात्रीलाई जान रोक लगाइएको र गएका व्यक्तिहरूको अवस्थाबारे सूचना लिइरहनु भएको बताएका छन्। विपद जोखिम आकलनपछि कमाण्ड पोष्टको बैठकमा जिल्ला आपत्कालीन कार्य सञ्चालन केन्द्र, सुरक्षा निकाय, स्वास्थ्य, खानेपानी, पूर्वाधार विकास कार्यालय तथा स्थानीय आपत्कालीन कार्य सञ्चालन केन्द्रसँग समन्वय गरेर उद्धार तथा राहतका तयारी गरिँदैछ। मुगु जिल्लामा प्रमुख जिल्ला अधिकारी पोषणराज भण्डारीले शुक्रवार बेलुका ५:०० बजेदेखि मध्यम खालको वर्षा निरन्तर भइरहँदा पहिरो जाने खतरा रहेकाले आज सवारी आवागमन रोक्न प्रहरी खटाइएको बताएका छन्। टेलिफोन नेटवर्क र प्रहरी सञ्चारमा समस्या रहेको जानकारी दिइएको छ। हुम्ला जिल्लामा प्रमुख जिल्ला अधिकारी भोलानाथ गुरागाईले हिमपातले नाम्खा गाउँपालिको हिल्सा, लिमी, लाप्चाको बाटो बन्द भएको जानकारी दिएका छन्। जोखिम क्षेत्रका बासिन्दालाई तीन दिनको भीतर सुरक्षित स्थानमा व्यवस्थापन गरिएको र कमाण्ड पोष्टको बैठकबाट सुरक्षा निकाय, रेडक्रस, स्वास्थ्य, खानेपानी तथा स्थानीय तहसँग खोज तथा उद्धारका तयारी गरिने निर्णय गरिएको छ।
Article source: Gorkhapatra National Daily | Image credit: Gorkhapatra National Daily